पछिल्लो समय निजामतीभित्र राजीनामाको लहरै चलेको छ । साउन अन्तिम सातामात्र सूचना तथा सञ्चार मन्त्रालयका सचिव डा कमलप्रसाद पोखरेलले राजीनामा दिए । तथ्यांक कार्यालयबाट सञ्चारमन्त्री विक्रम तिमिल्सिनाले रोजेरै लगेका डा पोखरेलले मन्त्रालयमा हाजिर भएको दुई दिन पछि नै राजीनामा दिएर हिडे ।उनी हाजिर भएर काम थालेको दोस्रो दिनमै असहज महसुस गरे । तेस्रो दिन सञ्चो नभएको भन्दै मन्त्रालय नगएका उनले त्यही पछि राजीनामा दिएका थिए । जागिर अवधि झण्डै एक बर्ष रहेका पोखरेलको राजीनामालाई अस्वभाविक मानिएको छ ।

बिज्ञापन

यता भदौं महिना लागे यता ३ सहसचिव र एक उपसचिवले राजीनामा दिएका छन् । भूमि व्यवस्था, सहकारी, संघीय मामिला तथा सामान्य प्रशासन मन्त्रालयको जगेडामा रहेका ६ सहसचिवमध्ये २ जनाले राजीनामा दिएका थिए । पछिल्लो समय सामान्य प्रशासनको जगेडा अर्थात अतिरिक्त समूहमा राखिएका सहसचिवहरु शंकरहरि आचार्य, राजेन्द्र देव पाण्डे, रूद्रप्रसाद लामिछाने,कृष्णबहादुर शाही, विनोद लामिछाने र चन्द्रबहादुर शिवाकोटी रहेकामा सहसचिवद्धय लामिछाने र शिवाकोटीले राजीनामा दिएका हुन । लामिछानेसँग आन्तरिक राजस्व कार्यालय, राजस्व अनुसन्धान विभाग, विमानस्थल भन्सार लगायतका संवेदनशील निकायहरुमा काम गरेको अनुभव छ । उनी यस अघि तत्कालीन प्रधानमन्त्री केपी शर्मा ओलीका निजी सचिव रहेर काम गरे । झण्डै एक बर्ष लुम्बिनी प्रदेशको मुख्यमन्त्री तथा मन्त्रिपरिषद्को कार्यालयबाट भूमि व्यवस्था, सहकारी, संघीय मामिला तथा सामान्य प्रशासन मन्त्रालयको अतिरिक्त समूहमा तानिएको उनी उनी लामो समयदेखि जिम्मेवारीविहिन थिए । अबकाशमा जान डेढ महिना अवधि बाँकी रहेका उनले गत भदौं १ गतेदेखि लागू हुने गरी दिएको राजीनामा हिजो स्वीकृत भएको हो ।